Ky vlerësim mbështetet nga Qendra Kombëtare e Librit dhe Leximit dhe Unioni i Gazetarëve Shqiptarë.
“E gjej me shumë emocion këtë ditë. Ky çmim do të jepet për brezat e rinj, për letrarët e rinj të pas viteve ’90. Ndër kriteret kryesore do të jenë origjinaliteti dhe qëndrueshmëria e veprës, humanizmi i spikatur dhe dhënia e copëzave të realitetit shqiptar, me të mirat dhe problemet e tij,” rrëfeu Agron Xoxa, djali i shkrimtarit të njohur Jakov Xoxa.
Ndërkohë, kryetari i Unionit Shqiptar të Gazetarëve, Aleksandër Çipa, theksoi rëndësinë e këtij çmimi për krijuesit e pas viteve ’90:
“Fakti që kjo nismë mbështet krijues në kohë të ndryshme dhe kryesisht ata të pas viteve ’90, tregon që autori e ka fituar atë që quhet çmimi i kohëve.”
Në konkurs mund të marrin pjesë autorë shqiptarë nga të gjitha trevat shqipfolëse dhe diaspora. Çmimi do të akordohet çdo vit në muajin dhjetor, në një mbrëmje gala, ku do të vlerësohen autorët më të spikatur që plotësojnë kriteret e origjinalitetit dhe pasqyrimit të realitetit shqiptar me humanizëm dhe ndjeshmëri.
Jakov Xoxa është një ndër romancierët më të njohur të gjysmës së shekullit të 20-të. Vepra e tij më përfaqësuese, “Lumi i Vdekur,” trajton fenomenin e natyrës dhe kulturës, duke i sprovuar përballë humanes, ku natyralja paraqitet si kundërpeshë e arrogancës së njeriut.
Çmimi “Jakov Xoxa,” që u akordua për herë të parë vitin e kaluar në përkujtim të 100-vjetorit të lindjes së shkrimtarit, është tashmë një traditë vjetore që synon të inkurajojë dhe promovojë krijuesit letrarë të brezit të ri dhe të letërsisë bashkëkohore shqipe.