Në episodin e radhës të emisionit “Në Fokus” në RTSH, gazetarja Majlinda Rama solli përballë publikut një zë me përvojë të thellë diplomatike: ish-ambasadori Islam Lauka. Me një karrierë të gjatë në shërbimin e jashtëm shqiptar, Lauka ndau për herë të parë në një formë të sinqertë përvojat, vlerësimet dhe dilemat që kanë shoqëruar rrugëtimin e tij si përfaqësues i shtetit shqiptar në disa nga skenat më delikate ndërkombëtare.
Pasi ka mbrojtur doktoraturën në Rusi dhe ka shërbyer si përfaqësues diplomatik i Shqipërisë në Moskë, Lauka solli në bisedë vështrime të thelluara mbi zhvillimet gjeopolitike, raportet historike dhe tensionet aktuale midis Lindjes dhe Perëndimit. Me përvojën e tij si ambasador i Shqipërisë në Kosovë, ai ndali gjithashtu te roli i Tiranës zyrtare në proceset e shtetformimit kosovar dhe sfidat që mbeten ende sot.
Në një dialog të ndërtuar me kujdes mes pyetjeve të drejtpërdrejta dhe përgjigjeve që shpesh mbartnin nëntekst diplomatik, Majlinda Rama arriti të hapë një dritare të rrallë mbi botën e politikës së jashtme shqiptare, atë që shpesh zhvillohet larg syrit publik.
Në mbyllje, Islam Lauka theksoi se diplomacia nuk është vetëm komunikim zyrtar , është mbrojtje e interesave kombëtare përballë një bote në ndryshim të vazhdueshëm.