Programi më i ri “Në Fokus” në RTSH, me autore gazetaren dhe shkrimtaren e njohur, Majlinda Rama, u çel me një dritare diskutimi mbi sfidat e shoqërisë dhe gazetarisë shqiptare, ku i ftuar në studio ishte një prej zërave më të angazhuar të gazetarisë, Aleksandër Çipa.
Në një bisedë të qartë, të drejtpërdrejtë dhe larg konformizmit, Çipa ndau reflektime mbi ndryshimet që ka pësuar profesioni i gazetarit ndër vite, sfidat etike dhe presionet që media përjeton në realitetin politik e ekonomik shqiptar. Pa u shmangur nga temat e mprehta, ai foli për rolin e shtypit të lirë në një demokraci funksionale dhe për përgjegjësinë që mbart fjala publike në një kohë mosbesimi të thellë qytetar.
Bashkëbisedimi mes Ramës dhe Çipës ishte një ndërthurje mes analizës së ftohtë dhe ndjeshmërisë profesionale, ku u ndërtua një hapësirë reale reflektimi mbi gazetarinë si mision dhe sfidë.
Në mbyllje, Çipa la një mesazh të fortë: “Nuk ka demokraci pa gazetarë të lirë. Media është pasqyra më e dhimbshme, por më e nevojshme e çdo shoqërie që do të përmirësohet.”