RUSI- Turqia do luajë një rol mjaft të rëndësishsëm sa i përket eksporteve të grurit nga portet ukrainase.

Në bisedimet me presidentin turk Rexhep Tajip Erdogan, presidenti rus, Vladimir Putin tha se Rusia është e gatshme të lehtësojë eksportin e papenguar të grurit nga portet e Ukrainës në koordinim me Turqinë.

“Gjatë diskutimit të situatës në Ukrainë, theksi u vu në sigurimin e lundrimit të sigurt në detet e Zi dhe Azov dhe eliminimin e kërcënimit të minave në ujërat e tyre. Vladimir Putin vuri në dukje gatishmërinë e palës ruse për të lehtësuar tranzitin detar të papenguar të mallrave në koordinim me partnerët turq. Kjo vlen edhe për eksportin e grurit nga portet e Ukrainës.”- thuhet në një deklaratë të Kremlinit.

Sipas Reuters, Putin shtoi, se nëse sanksionet hiqen, atëherë Rusia mund të eksportoje vëllime të konsiderueshme plehërash dhe produktesh bujqësore. Portet në të gjithë Ukrainën janë të mbushura me më shumë se 20 milionë tonë metrikë drithë dhe misër që nuk kanë ku të shkojnë, me Rusinë që bllokon bregdetin e Detit të Zi dhe rrugët e daljes për drithërat e Ukrainës.

Ukraina dikur eksportonte shumicën e mallrave të saj përmes porteve detare, por që kur Rusia pushtoi vendin, ajo është detyruar të eksportojë me tren ose nëpërmjet porteve të saj të vogla të lumit Danub. Si rezultat, çmimet globale të grurit u rritën me 20% në mars, për shkak të ndikimit të drejtpërdrejtë të luftës në prodhimin e grurit, me botën që po përballet me një gjendje përkeqësuese të pasigurisë ushqimore dhe kequshqyerjes, në një kohë kur 42 milionë njerëz ishin tashmë një hap larg urisë./Xh.R